అమెరికాలో అటార్నీగా పులివెందుల యువకుడు.. టీడీపీ ఎమ్మెల్సీ కుమారుడి ఘనత

కడప జిల్లా పులివెందులకు చెందిన యువకుడు అమెరికాలో అరుదైన ఘనత సాధించారు. టీడీపీ ఎమ్మెల్సీ భూమిరెడ్డి రామ్‌గోపాల్‌రెడ్డి కుమారుడు, టీఎన్ఎస్ఎఫ్ ఆంధ్రప్రదేశ్ రాష్ట్ర ఉపాధ్యక్షుడు అయిన భూమిరెడ్డి సాయి శ్రీనివాస్ రెడ్డి, అమెరికాలోని ఇండియానా రాష్ట్రంలో లైసెన్స్‌డ్ అటార్నీ (న్యాయవాది)గా ప్రమాణ స్వీకారం చేశారు. కేవలం 25 ఏళ్ల వయసులోనే, తొలి ప్రయత్నంలోనే ఈ విజయం సాధించి ఆయన తెలుగు సమాజం గర్వపడేలా చేశారు.

ఈ సందర్భంగా రాష్ట్ర మంత్రి నారా లోకేశ్‌, సాయి శ్రీనివాస్ రెడ్డికి ఎక్స్ (ట్విట్టర్) వేదికగా ప్రత్యేక అభినందనలు తెలిపారు. "మన టీఎన్ఎస్ఎఫ్ రాష్ట్ర ఉపాధ్యక్షుడు, పులివెందుల వాసి సాయి శ్రీనివాస్ రెడ్డి 25 ఏళ్లకే, తొలి ప్రయత్నంలోనే అమెరికాలో లైసెన్స్ పొందిన న్యాయవాదిగా ప్రమాణం చేయడం యావత్ తెలుగు సమాజానికి గర్వకారణం. భారత్, అమెరికా రెండింటిలోనూ న్యాయవాదిగా లైసెన్స్ పొందిన అతి పిన్న వయస్కుడిగా శ్రీనివాస్ రెడ్డి అరుదైన ఘనత సాధించారు" అని లోకేశ్‌ తన ట్వీట్‌లో కొనియాడారు.

భూమిరెడ్డి సాయి శ్రీనివాస్ రెడ్డి విద్యాభ్యాసం కూడా ఉన్నత స్థాయిలో సాగింది. ఆయన అలయన్స్ యూనివర్సిటీ నుంచి బీబీఏ, ఎల్‌ఎల్‌బీ పట్టా పొందారు. ఆ తర్వాత అమెరికాలో మాస్టర్ ఆఫ్ లాస్ (ఎల్ఎల్ఎం) పూర్తిచేశారు. అంతేకాకుండా, ప్రతిష్ఠాత్మక లండన్ స్కూల్ ఆఫ్ ఎకనామిక్స్ అండ్ పొలిటికల్ సైన్స్‌లో సమ్మర్ ప్రోగ్రామ్స్‌లో కూడా పాల్గొన్నారు. ఇటీవలే ఇండియానా బార్ పరీక్షలో ఉత్తీర్ణత సాధించడంతో ఇప్పుడు ఆయన భారత్, అమెరికా దేశాల్లో ఏకకాలంలో లీగల్ ప్రాక్టీస్ చేయడానికి అర్హత సాధించిన అతి పిన్న వయస్కుడిగా రికార్డు సృష్టించారు.

సాయి శ్రీనివాస్ తండ్రి భూమిరెడ్డి రామ్‌గోపాల్‌రెడ్డి కూడా విద్యార్థి నాయకుడిగా తన ప్రస్థానాన్ని ప్రారంభించి, జర్నలిస్టుగా పనిచేసి, ఆ తర్వాత రాజకీయాల్లోకి వచ్చారు. ప్రస్తుతం ఆయన పశ్చిమ రాయలసీమ (అనంతపురం, కడప, కర్నూలు) పట్టభద్రుల నియోజకవర్గం నుంచి టీడీపీ ఎమ్మెల్సీగా ప్రాతినిధ్యం వహిస్తున్నారు. తండ్రి రాజకీయ వారసత్వాన్ని కొనసాగిస్తూనే, కుమారుడు అంతర్జాతీయ స్థాయిలో న్యాయ రంగంలో తనదైన ముద్ర వేయడం విశేషం.